Денес, на Меѓународниот ден на мајчин јазик, премиерот Христијан Мицкоски испрати порака од Вашингтон преку социјалните мрежи, истакнувајќи ја важноста на македонскиот јазик како симбол на идентитет, историја и култура.

• „Македонскиот јазик не претставува само алатка за комуникација, туку е жив сведок на нашето постоење, длабока емоција и суштински дел од нашиот идентитет. Тој е јазик што нè обликува, ни помага да сакаме, да се бориме и да сонуваме. Да го почитуваме, негуваме и со гордост да го пренесуваме на следните генерации, бидејќи секој изговорен збор е сведоштво за нашата традиција, културно наследство и непокорен дух“, напиша Мицкоски.

„Јазикот е наш корен“

„Денес, на овој значаен ден, да му оддадеме чест на јазикот кој е наш корен, наш завет и наше право. Како што вели Крсте Петков Мисирков – ‘Јазикот е наш долг и наше право.’ Среќен нека биде овој ден за сите кои зборуваат од срце, на јазикот што ги поврзува со нивните предци.“