Владата го усвои предлогот за разрешување на републичкиот обвинител Љупчо Коцевски. Го подготви Министерството за правда откако претходно го задолжи владата со образложение за непрофесионално работење и нарушен углед на обвинителството.
-Неовластено изнесувал информации и податоци за судски предмети, ја повредил тајноста на постапката, непрофесионално го водел ЈО и му наштетил на угледот на Обвинителството и направил крупни професионлани грешки, помеѓу другото се наведува во предлогот за разрешување на Коцевски.
Откако Владата предлогот ќе го достави до Советот на јавните обвинители ќе почне да тече законскиот рок од 15 дена во кој Советот ќе треба да даде позитивно или негативно мислење. Советот на ЈО има дополнителни 15 дена рок да одговори доколку во првите не даде мислење.
Сепак последниот збор за разрешувањето на државниот обвинител ќе го имаат пратениците за што е потребен 61 глас. Опозициската СДСМ обвини дека зад разрешувањето на Коцевски стои груба партизација иако тврди дека е за реформи во судството. Од ВМРО ДПМНЕ пак велат дека СДСМ брани корумпирано судство и обвинителство.
-СДСМ е за реформи во судството, но ова што го прави власта е груба партизација. Ставот на СДСМ е јасен по ова прашање и никогаш не бил доведен во дилема. Ние сме за реформи во судството, но ова што го прави власта е дефинитивно една груба партизација. Затоа повикуваме да се тргнат рацете на политиката од судството и да се видат сериозни чекори дека се работи на сериозни реформи во однос на подобрување на состојбата.- Богданка Кузеска – СДСМ
-СДС брани корумпирано обвинителство и судство. Вчера заменик претседателката на СДС јасно ги поддржа судиите и обвинителите заради кои довербата во правосудството е 2%. Потребни се реални реформи во судството и обвинителството. Со кадрите на СДС и ДУИ во судството и обвинителството, кои чекаат да дојде предмет против нивните шефови за да го отфрлат или закочат не се гради доверба во судството и обвинителството. – Миле Лефков – ВМРО ДПМНЕ
Со разрешувањето на Коцевски паралено тече и собраниската процедура за интерпелација на петте членови на Судскиот совет избрани од пратениците. Весна Дамева, Павлина Црвенковска, Тања Чачарова Илиевска, Селим Адеми и Миљазим Мустафа ги доставиле одговорите до собранискиот спикер Африм Гаши наведувајќи дека не чувствуваат морална и професионална одговорност. Според нив причините со кои се бара нивна интерпелација биле паушални, наведуваат дека се прави преседан и упад во судската власт и бараат индивидуална а не колективна одговорност. Интерпелациите на дневен ред на собраниска седница според најавите ќе се најдат на почетокот на март.