ВМРО-ДПМНЕ контра Сојузот на синдикати. Од владејачката партија обвинуваат дека дел од лидерите го претвориле ССМ во приватна фирма и со потпишување договори на дело си ги пумпале личните приходи, дека додека се претставуваат како борци за некакви работнички права и за поголем минималец, дебело профитирале.
Според информациите кои ги добивме, платата на Пешевски, кој деновиве глуми загрижен синдикалец е 3 пати поголема од минималната. Додека ги лаже работниците со минималец, Иван Пешевски, за 4 месеци заработува што тие за цела година. Но тука не застанува лицемерието на Иван Пешевски, тој во 2024 и првите два месеци од 2025 година остварил и приходи по други основи со договори на дело и заедно со плата инкасирал 1.3 милиони денари, вели Валентин Манасиевски, член на Централниот комитет на ВМРО-ДПМНЕ.
Првиот синдикалец возврати дека власта напаѓа само за да не ја зголеми минималната плата. Слободан Трендафилов вели дека платите на членовите на ССМ се обезбедуваат преку чланарината и дека се далеку од сумите за кои говори владејачката партија. Вели дека е подготвен да работи за 500 евра доколку тоа го направат сите избрани и именувани функционери и се изгласа нивниот предлог за поголем минималец.
Несериозно е да гледаат дека нема никакви реакции за 60.000 плата, да измислуваат 70.000 денари, на друг 104.000 денари. Го повикувам да даде од неговата плата, за да ми ги надополни овие 15.000 денари кои ги немам и секој месец да имам 75.000 денари, за да не лаже“ Од утре, мене и нив платата да ни биде 500 евра, ама заедно да изгласаат закон за работниците да добијат 500 евра минимална плата, рече Трендафилов.
Препукувањата се случуваат во моменти кога најниската плата се зголеми за 2.200 денари, како што предвидува методологијата. Синдикатот не се согласува и надвор од законот бара уште 5.600 денари повеќе, а денеска излезе и со ново барање – покачување од 6.000 денари за сите.
Владата ја остави можноста платите да се зголемат и повеќе, но доколку за тоа се согласат работниците и работодавачите. Децидни се дека буџетот бил оставен во лоша кондиција од нивните претходници и дека државата не може да го субвенционира покачувањето.
Во вакви услови СДСМ поднесе предлог – закон за ослободување на компаниите од плаќање придноеси на зголемениот дел од платата, иако додека седум години беа на власт не го направија тоа и тврдеа дека мора да се почитува актуелната методологија.