Ова е ставот на премиерот Мицкоски по јавната кавга и меѓусебни остри тонови кои двајцата си ги разменија јавно синоќа околу потребните реформи во правосудството. Премиерот денеска изјави дека владината коалиција е стабилна, а јавното препукување меѓу Милошоски и Филков, очекува да застане на, како што кажа, овие два лични става.

-Пратеникот Антонијо Милошоски е член на Извршниот комитет на партијата, тој е дел од мојот најблизок периметар. Министерот Игор Филков знам со какви проблеми се соочи, знам каква состојба затекна во Министерството за правда, континуирано на дневна основа соработуваме во делот на реформите, кои се многу важни посебно во секторот правда. Но, она што можев да го заклучам, а убеден сум дека сето ова ќе застане на овие два лични ставови е дека секој има право на лош ден, па така јас мислам дека тој лош ден и за едниот и за другиот завршува, рече Мицкоски.

Прашањето за превирања во владината коалиција се отвори откако пратеникот на ВМРО-ДПМНЕ, Милошоски, вчера во телевизиско гостување изнесувајќи личен став го искритикува министерот Филков за, како што рече, слаби перформанси за обврските коишто ги има преземено за реформите во правосудството. Следуваше остра реакција од Филков која на социјалните мрежи му одговори дека тој како пратеник активно учествувал во креирањето на канцерогениот правосуден систем и во донесувањето на штетните измени во Кривичниот законик, со што се спасил од одговорност за кривичното дело „Моќник“.

„Кусурот на Груевски, познат под прекарот Џуџето од Небрегово, а јавноста го памети по аферите поврзани со АМСМ и семејните бизниси од Кичево, изгледа се уште нема навика да одговара пред граѓаните што го избрале“, напиша меѓудругото министерот за правда, Филков, споделувајќи 16 законски решенија за реформи во правосуднуиот систем, за кои вели дека дел се подготвени и објавени на ЕНЕР, а десетици други што се во процедура.

Прашан за коментар лидерот на СДСМ, Венко Филипче, пак, не сакаше да ги коментира односите во владината коалиција, но како претседател на националниот совет за евроинтеграција во Собранието смета дека Владата нема добар перформанс за реформските закони од правосудството.

Искрите меѓу функционерите на ВМРО-ДПМНЕ и ЗНАМ доаѓаат ден по информациите за несогласувања во коалицијата „Вреди“ за коишто јавно проговори министерот Таравари кој посочи дека перформансот на кадрите од Вреди не е на задоволително ниво. Мицкоски, пак, тврди дека нема проблоеми со нив, соработката е квалитетна, а Владата е стабилна.