Природниот гас во Европа продолжи да поскапува додека трговците ја проценуваат неизвесноста околу натамошниот тек на конфликтот на Блискиот Исток и рамнотежата меѓу понудата и побарувачката во регионот.

Референтните фјучерси надминаа 85 евра за мегаватчас, откако во претходната трговска сесија пораснаа за 2,7 отсто. Разговорите за завршување на војната со Иран бележат мал напредок, а нападите врз танкери во Ормускиот теснец продолжија и неделава. Највисокиот безбедносен функционер на Техеран негираше дека се водат преговори со САД, објави иранската државна агенција ИРНА.

Увозот на течен природен гас во Европа е под ланското ниво, а невообичаено ниските зимски резерви почнаа да се намалуваат со почетокот на грејната сезона. Рамнотежата меѓу понудата и побарувачката во Европа зимава во голема мера зависи од тоа колку брзо ќе се обноват испораките низ Ормускиот теснец, особено оние од Катар, кој е водечки извозник.

Војната со Иран отстрани од пазарот речиси една петтина од светскиот извоз на течен природен гас, па Европа и Азија се натпреваруваат за ограничените количини. Цените на гасот во двата региона неодамна скокнаа на највисокото ниво од 2022 година и се повеќе од трипати повисоки отколку на почетокот на годината.

Иако цените се намалија месецов поради надежите за напредок во мировните преговори, кои се засилија по изборите во САД на средината од претседателскиот мандат, тие остануваат високи бидејќи понудата на пазарот и натаму е ограничена.

Полската енергетска компанија „Орлен“ (Orlen SA) раскина еден од своите долгорочни договори со „Катар енерџи“ (QatarEnergy), што е нов удар за Катар како голем извозник на течен природен гас. „Орлен“ како причина наведе дека „Катар енерџи“ не може да ги исполни обврските за испорака бидејќи конфликтот на Блискиот Исток го нарушува транспортот.

Холандските фјучерси со најблизок рок на доспевање, референтни за цената на гасот во Европа, во 9:03 часот по локално време во Амстердам се тргуваа по 86,78 евра за мегаватчас, што е раст од 2,4 отсто.