Дали има поделби во коалицијата ВРЕДИ? Претседателот на Алијанса за Албанците, Арбен Таравари дури и јавно вели дека имаат проблеми, бидејќи се несинхронизирани. Според него, ВРЕДИ функционира многу бавно бидејќи има 4 партии и 4 претседатели
-Реков дека не сме синхронизирани затоа што четири партии… една партија има проблеми а кога има четири партии, четворица лидери, четворица партиски претставници треба да се консултираат за се и ова е тема што ни создава потешкотии во периодот додека сме во власта, изјави Арбен Таравари, претседател на АА.
Новинар: Значи не е дека имате проблем со одредени функционери, туку недоброто функционирање?
-Мислам дека лошата координација ги остава овие последици, изјави Арбен Таравари, претседател на АА.
Таравари пред новинарите демантира дека ќе ја напушти коалицијата ВРЕДИ. Сепак, потенцира дека доколку не се прифатат условите што ги поставил за локалните избори, можно е тие сами да излезат со листи и градоначалнички кандидати.
-Не. Имаме две опции за локалните избори, како што реков, едната е да одиме како ВРЕДИ заедно, што сакам да биде, а втората е да излеземе на локалните избори сами како Алијанса за Албанците, изјави Арбен Таравари, претседател на АА.
Но, што велат од ДУИ за каналите за комуникација кои ги спомнува Таравари!? Потпретседателот на партијата Арбр Адеми рече дека секој што се оградува од план, кој има за цел дефакторизирање на Албанците, има поддршка од ДУИ.
-Секоја политичка партија што ќе се повлече од планот за дефакторирање на Албанците секако ја има поддршката од ДУИ, од оваа добро организирана, добро етаблирана, сериозна структура во земјава, изјави Арбр Адеми, потпретседател на ДУИ.
Одговарајќи на прашањето дали Таравари ќе оди со ДУИ на локалните избори, Адеми вели дека немаат формални договори или преговори со никого.
