Претставници на семејствата на жртвите од трагедијата во Модуларната болница во Тетово одржаа прес-конференција пред Основниот суд во Тетово, при што нагласија дека се приклучуваат на јавното писмо од Иницијативата Нула, упатено до државниот јавен обвинител Љупчо Коцевски.
Како што изјавија претставниците на семејствата, постојат сериозни докази за кои сметаат дека Обвинителството ги игнорирало во досегашната истрага.
„Целата јавност знае дека постојат сериозни докази за пропустите при изградбата на модуларната болница, кои можат да бидат единствени причини за пожарот. Тоа беше потврдено со германското вештачење – независен и кредибилен доказ кој, за жал, беше отфрлен од обвинителството. Драг Љупчо, како наш сограѓанин од Тетово, Вие најдобро ја разбирате болката и гневот на семејствата на жртвите и на целата заедница. Ова не е само правно прашање. Ова е морална обврска – кон тие што ги изгубивме, но и кон сите граѓани што денес живеат со страв дека ова може да се повтори, а никој нема да одговара“, изјави Агрон Арифи од Иницијативата, во име на семејствата на жртвите.
Семејствата на 14-те жртви бараат од Обвинителството да ја обнови истрагата за, како што велат, вистинските виновници на пожарот во Модуларната болница.
„Време е некој да преземе одговорност. Време е правдата да излезе од фиока. Како семејства на загинатите, бараме од Вас: да формирате независен тим кој ќе ги испита сите аспекти на случајот, вклучително и евентуалното одолговлекување на постапката. Да гарантирате дека судската постапка ќе се води без политичко-бизнис влијание. Да обезбедите транспарентност и отчетност во Вашата работа, во согласност со законските обврски. Да го земете германското вештачење како клучен доказ во истрагата. Ние нема да молчиме. Ќе продолжиме да зборуваме за нашите најблиски кои ги изгубивме, за вистината, за правдата која е ветена, но никогаш донесена“, изјави Арифи.
Во меѓувреме, од 10 часот денеска во Основен суд Тетово продолжи доказната постапка во рамки на повторното судење за пожарот во Модуларната болница, во кое осомничени се двајцата поранешни директори на болницата и Јавната здравствена установа Клиничка болница Тетово како правно лице.
