Министерот за здравство Азир Алиу денеска беше на средба со медицински сестри, лекари, и друг персонал во Клиничката болница Тетово кои работат со договори на дело. По средбата тој изјави дека административната процедура е завршена и дека останува последниот чекор за полагање на административниот тест за да добијат вработување на неопределено време.

Групата медицински сестри, техничари, болничари, администрација, како и лекари на крајот на мај и на почетокот на јуни одржа неколку јавни протести со цел да алармира на потребата да бидат трајно вработени во установата.

– Некои од нив работат 10 години, некои помалку. Некои од нив работеле од месец, месец и пол, или година, година и пол без плата само за да бидат дел од институцијата. Денеска, после месец и пол задоволни сме дека тие веќе се дел од нашата здравствена институција во Тетово – 155 вработени. Процедурите административно ги завршивме, сега е само крајниот чекор за полагање на тој административен тест за да може да се потпишат и договорите помеѓу директорот и вработените – истакна министерот Алиу.

Вработените пред новинарите посочија дека прашањето за нивниот работен статус за првпат се зема сериозно и се третира со одговорност.

Таа искажа благодарност до актуелниот министер за здравство, директорот на клиничката болница Тетово и до медиумите.

Според министерот Алиу, медицинските сестри треба да полагаат административен тест, додека докторите треба да полагаат испит којшто е креиран од Министерството за здравство.

Министерот за здравство, Азир Алиу на прес – конференција вчера во Министерството за здравство најави дека во Клиничката болница во Тетово 155 медицински сестри, лекари и друг персонал ќе добијат договори за вработување на неопределено време. Со тоа, како што кажа, ќе заврши агонијата на 155 лица од кои некои од нив со години работат во институцијата без решен статус.