Александар Вучиќ, носителот на листата „Обединета Србија“, на завршниот митинг во Халата на спортови во Белград изрази уверување во победа на претстојните парламентарни избори во Србија, додека Студентската листа истовремено одржа предизборен собир на плоштадот Славија во Белград. Изборите се на 25 октомври и претставуваат голем предизвик за бившиот претседател Вучиќ, кој сега се кандидира за премиер.

Вучиќ ги повика своите приврзаници да ѝ подадат рака на другата страна, но и да не заборават дека „таа се обиде да ја урне државата“.

„Влогот е голем и тежок. Извршен е зол и масивен напад врз Србија, зашто противниците се обидоа да ја уништат според налог однадвор. Огромни пари влегоа во земјата и затоа ова е најтешката битка. Нѐ нападнаа со милијарди евра, а ние се браневме со нашата програма и љубовта кон татковината. На насилството не одговаравме со насилство“, кажа Вучиќ.

Тој ја обвини Студентската листа дека сака да ја раздели Србија од Кина и дека не сака да се изјасни за санкциите за Русија.

За тоа време, огромна маса луѓе се собра на плоштадот Славија, во знак на поддршка за „Студентска листа-Студентите победуваат“. Учесниците тргнаа кон Славија организирано во шест колони од различни делови на градот.

Кандидатите и студентите порачаа дека на неделните избори не се избира помеѓу 18 листи, туку помеѓу две начела и две визии.