Според Националната гарда, некои од војниците што биле во зградата неодамна биле мобилизирани, додека останатите се притворени откако произволно ја напуштиле својата воена единица и чекале да бидат распоредени во други единици. Четири војници биле повредени и испратени во болница на лекарски преглед.

„Командата на Националната гарда, во соработка со полицијата и со другите надлежни служби, ја презеде контролата врз истрагата за овој случај. Доколку се докаже дека на територијата на воениот објект се случиле какви било нелегални насилни дејствија, одговорните ќе бидат соодветно казнети“, објави Првиот корпус на Националната гарда. Украинската Национална гарда објави дека подоцна ќе ги објави детали за повредите и здравствената состојба на војниците и повтори дека никој не е убиен.

Полиција потврди дека интервенирала на местото на настанот и ги отфрли тврдењата дека луѓето биле нелегално приведени или дека некој го загубил животот. Според полициското соопштение, полицајците биле испратени на локацијата по повик од вработена во приватна амбуланта (за која подоцна се покажа дека лажно се преставувала и дека работи во амбуланта за естетска хирургија), која пријавила дека и е забранет пристап до маж во зградата. По пристигнувањето на местото на настанот, полицајците пронашле членови на Националната гарда и собрани мештани пред куќа.

Руската мрежа ботови цела ноќ објавуваше информации за наводно постоење соби за тортура во објектот, за мачења па и за убиство, а на сите снимки се појави 14-годишник кој, како што се покажа, глумел дека бил затворен во објектот – иако подоцна беше документирано дека бил дел од протестите, фрлал камења врз полицијата и се префрлил внатре преку зидот. Асоцијацијата беше дека се мачат украински државјани со руско потекло и  дека се мачат дезертери.

Демонстрантите почнале да фрлаат јајца кон полицајците и членовите на Националната гарда, а потоа пробиле ѕид во обид да влезат во објектот. Властите одговориле со солзавец и со предупредувачки истрели во воздух. На местото на настанот биле испратени и засилувања на Националната гарда. Пристигнал и автобус кој се обидел да транспортира околу 15 лица приведени во зградата.

На социјалните мрежи се појавија снимки на кои се гледа напнатата ситуација. Демонстрантите бараа пристап до зградата, тврдејќи дека луѓето внатре се нелегално приведени и повредени. Неколку канали на Телеграм објавија дека вооружени мажи држат околу 40 лица како заложници во подрумот на зградата. Исто така, имаше непотврдени извештаи дека едно лице е убиено.

 

 

Украинскиот министер за внатрешни работи Иван Вихивски изјави дека на членовите на семејствата на приведените војници им е дозволено да комуницираат со нив и дека медицинските работници и претставниците на јавноста се поканети на местото на настанот.Олха Решетилова, украинскиот воен омбудсман, истакна дека на местото на настанот се води истрага и дека сите околности на инцидентот ќе бидат разјаснети.Синоќа, околу 22 часот по локално време, на местото на настанот пристигна и Кирил Буданов, раководител на Кабинетот на украинскиот претседател Володомир Зеленски.

„ Дојдов тука за да разберам што по ѓаволите се случува“, рече Буданов.

Тој рече дека во зградата имало 14 воени лица и дека обидите за транспорт на повредените војници биле попречени од блокадата што ја поставиле демонстрантите.

„ Ова едноставно не треба да се случува и не е во ред“, изјави Буданов за телевизијата Канал 24.Буданов ги нарече настаните во Петропавливска Боршчахивка неприфатливи и вети дека ќе ги казни виновниците.

Денес тој  најави дека се подготвуваат сите неопходни одлуки за да се обезбеди „соодветен одговор и да се спречат провокации“.  Според него, вчерашните настани во близина на Киев се „неприфатливи за државата и штетни за единството на Украинците, особено со оглед на руската закана“.

„Органите на редот и надлежните институции ги истражуваат сите детали за да добијат објективна и целосна слика за настаните, да преземат неопходни мерки за одговорните да сносат одговорност и да спречат повторување на вакви ситуации во иднина. „о моментов работиме со секторот за безбедност и одбрана на подготовка на сите неопходни одлуки за соодветен одговор и спречување провокации. Ги повикувам сите Украинци секогаш да се водат од интересите на нацијата и државата кога носат одлуки или решаваат конфликти“, напиша тој на Телеграм.