Приведени се 17 припадници на затворската полиција на најголемиот затвор Идризово поради поврзаност со бегство на затвореник. Од обвинителството велат дека апсењето е поврзано со бегство на затвореник кој бил носен во приватна болница на лекување.
Обвинителството соопшти дека затвореникот надвор од правилата бил носен на наводни лекарски интервенции од каде излегувал и се шетал по Скопје, додека затворските полицајци го чекале во болничкиот апартман, сами без да го пријават оддалечувањето на осуденикот од Идризово.
Според официјалните информации на ОЈО ГОКК, за шестмина од осомничените е отворена истрага и се бара да им биде одреден притвор. Против преостанатите 11 нивни колеги постапката е сè уште во фаза на предистрага и за нив надлежен јавен обвинител предложил до Судот да им одреди мерки на претпазливост.
„На 26.10.2023 година во приватна здравствена установа во Скопје, петмината осомничени – затворски полицајци при КПД Идризово Скопје, како група, со умисла помогнати од шестиот осомничен затворски полицаец – приправник, овозможиле бегство на лице осудено за кривично дело „Убиство“. Додека осуденото лице било на медицински третман, согласно прописите било обезбедувано од затворската полиција. Критичниот ден со придружба на двајца осомничени затворски полицајци, лицето се упатило во просторијата за пушење во непосредна близина на болницата. Таму, заедно со придружбата поминало околу половина час, по што осомничените затворски службеници заминале, овозможувајќи му на осуденикот да излезе од просторијата и со патничко возило да се даде во бегство.“ – пишува во соопштението на Јавното обвинителство на РСМ.
Осомничените затворски службеници не го пријавиле бегството кај старешините, а Останатите во период од една недела на истиот затвореник му овозможувале да оди во болница, на наводни третмани. Затворските полицајци утрово биле повикани во полициска станица и тогаш биле приведени. За 6-мина затворски полицајци кои го чекале затвореникот во болнички апартман додека тој избеган се шетал низ главниот град, обвинителството бара притвор. Од МВР потврдуваат дека биле приведени 17 припадници на затворската полиција, вработени во КПД Затвор Идризово и за што е поднесена кривична пријава.
„На 15.04.2024 Секторот за криминалистички истраги во координација со Основното јавно обвинителство за гонење на организиран криминал и корупција ги лиши од слобода сите 17 лица и ги предаде на Основнот кривичен суд Скопје за понатамошно постапување.“ – пишува во соопштението на МВР.
Од министерството за правда велат дека очекуваат информација од Управата за извршување санкции, дд Управата за извршување санкции во телефонски разговор ни ја потврдија информацијата дека има приведени но за причините рекоа дека немаат информација.
